ಶುದ್ಧಿ

ಮಲಿನವೋ ಎಲ್ಲೆಲ್ಲೂ ಮಲಿನವೋ
ಭೂಮಿಯ ಮೈಯೆಲ್ಲಾ ಮಲಿನವೋ

ಎಲ್ಲೆಂದರಲ್ಲಿ ಕಸವ ಬಿಸಾಡಿ
ಗುಟ್ಕಾ, ಬೀಡಾ ಜಗಿದು ಉಗಿದು
ಪೇಪರ್, ಪ್ಲಾಸ್ಟಿಕ್, ಸಿಗರೇಟ್, ಬೀಡಿ
ಹೋಯಿತು ಇಳೆಯ ಕತೆ ಮುಗಿದು.

ಕರ ಕಟ್ಟುವೆನೆಂದು ಕಸವನ್ನೆಸೆದರೆ
ಕಸ ಕರಗುವುದೇ ಕಲ್ಲು ಸಕ್ಕರೆಯಂತೆ?
ಶುದ್ಧಿಯ ಮೌಲ್ಯ ಅರಿಯದೆ ಹೋದರೆ
ಸ್ವಾಸ್ಥ್ಯದ ಮೇಲಿನ ಪ್ರಹಾರವಂತೆ.

ಶುಚಿತ್ವವೇ ದೈವತ್ವದ ಮೂಲ
ಶೌಚವಿಲ್ಲದ್ದು ರೋಗದ ಜಾಲ
ಶುಭ್ರತೆಗೆ ಮೀರಿದ ಅಂದವಿಲ್ಲ
ರುಜಿನಕೆ ಇಲ್ಲಿ ಸ್ಥಳವಿಲ್ಲ

ಶುದ್ಧಿಯು ಏಲ್ಲೆಡೆ ಪಸರಲಿ
ಅಂತರಂಗದಿ ಬೆಳಗಲಿ
ಬಹಿರಂಗಕೂ ಹರಡಲಿ
ಹೊಸ ದಿಗಂತಕನುವಾಗಲಿ.

ಮಾಘ ಮಾಸುವ ಮುನ್ನ

ಕೊರೆಯುವ ಚಳಿಯಲ್ಲಿ ಬೆಚ್ಚನೆ ಹೊದ್ದು

ಸುಖನಿದ್ರೆಯ ಸವಿಗನಸನು ಕಂಡು

ಇನ್ನೇನು ಬರಬೇಕು ಗೊರಕೆಯ ಸದ್ದು

ಕಾಲ ಬಳಿ ಕುಳಿತಿತ್ತೊಂದು ಕರಿನೆರಳು

ಕತ್ತಲ ಕೋಣೆಯಲಿ ಮಂಪರ ಮತ್ತಿನಲಿ

ಭಾರವಾದ ರೆಪ್ಪೆಗಳ ತೆರೆಯುತ್ತ

ಪಿಳಿಪಿಳಿ ನೋಡುತ್ತ ಕಣ್ಬಿಟ್ಟ

ಆ ಮನೆಯ ಏಕಾಂಗಿ ಬ್ರಹ್ಮಚಾರಿ

ಮುಂದಿದ್ದ ಆಕೃತಿಯ ಕಂಡದ್ದೆ

ಝಲ್ಲೆಂತು ಅವನೆದೆಯು

ಕಲ್ಲಂತೆ ಕುಳಿತಿದ್ದಲ್ಲೇ

ಮೆಲ್ಲನೆ ನಕ್ಕಿತು ಆ ಹೆಣ್ಣುಧ್ವನಿ

ಪಕ್ಕದಲ್ಲೇ ಇದ್ದ ಬತ್ತಿಯ ಹಚ್ಚಿ

ಮಂದಬೆಳಕಿನಲಿ ಮಧ್ಯರಾತ್ರಿಯಲಿ

ಮೆಲ್ಲನೆದ್ದು ಅವಳ ಬಳಿ ಸರಿದು

ನೋಡಲು ಮುಖವೆಲ್ಲ ಮುಚ್ಚಿದ್ದ ಕೇಶರಾಶಿ

ನಡುಗುತ್ತಲೆ ಕೈಯಿಂದ

ಅವಳ ಕೂದಲ ಸರಿಸಲು

ಅಪ್ರತಿಮ ಸುಂದರಿ ಅವಳು

ಅವನ ನೋಡಿ ಮುಗುಳ್ನಕ್ಕಳು

ಭಯದಲ್ಲಿ ಅದುರುತ್ತಿದ್ದವನಿಗೆ

ಸಿಹಿಮುತ್ತು ಕೊಡುವ ನೆಪದಲ್ಲಿ

ಬರಸೆಳೆದು ಬಿಗಿದಪ್ಪಿ ತುಟಿಗಳ ಬಂಧಿಸಿ 

ಚುಂಬಿಸುತ್ತಾ ಕಚ್ಚಿ ಕಿತ್ತೆಸೆದು ಗಹಗಹಿಸಿದಳು.